Спорт – біздің серігіміз

Байысов атындағы орта мектепте салауатты өмір салтын ауылда дамыту мақсатында әйелдер арасында «Спорт – біздің серігіміз» атты эстафеталық сайыс өтті. Нәзік жандылар арасында ұйымдастырылған спорттық жарысқа бес команда қатысты. Атап айтқанда, математика, информатика пән бірлестігінен құрылған «МИФ», бастауыштардан құрылған «Бес жұлдыз», ағылшын және орыс тілі пән мұғалімдері «Лингвист» қазақ тілі мен тарих бірлестігі «Жастар» биология, химия, өзін-өзі тану бірлестігінің «Позитив» және техперсонал қызметкерлерінен құралған «Қыран» командалары өзара сайысқа түсті. Ең алдымен, әр команда өздерін таныстырып, ұрандарын айтты. Сайыс барысында «Доппен жарыс», «Футболшы», «Секіртпемен секіру», «Мергендер» және «Арқан тарту» сияқты кезеңдерден сүрінбей өтіп, алдыға шыққан «Бес жұлдыз» командасы бірінші орынды жеңіп алды. Екінші орынға «МИФ» командасы көтерілсе, жарыстың үшінші орыны «Қыран» тобына бұйырды. Жарысқа төрелік көрсеткен мектеп директорының әдістемелік жұмыс жөніндегі орынбасары Н.Нурсейітов жеңімпаздарды құттықтап, ақшалай сыйлықтарын табыстады.